ජේන් අයර් – Jane Eyre

‘ජේන් අයර්’ යනු ඉංග්‍රීසි ජාතික ලේඛිකාවක වූ චාලට් බ්‍රොන්ටේ විසින් ‘කියුරර් බෙල්’ යන අනවර්ත නාමය යටතේ 1847 වසරේ දී ලියන ලද නවකතාවකි. සැබෑ වික්ටෝරියානු සමාජය නිරූපණය කෙරෙන මෙහි ඇත්තේ කාන්තාවකගේ ඇතුලාන්ත සිතුම් පැතුම්, සිය අභිලාෂයන් මුදුන්පත් කරගැනීම සඳහා කාන්තාවක් සිදුකරනා අරගලයන් ආදී කාරණාවන්ය. උත්තම පුරුෂ ශෛලියෙන් ලියා ඇති නිසා මෙයින් පවසන්නට අදහස් කරන දෑ මනාව අවබෝධ වෙයි. මෙහි ප්‍රධාන චරිතය වන ජේන් අනාථ දැරියක් බව පෙන්වා දෙමින් නවකතාව ආරම්භ වෙයි. වයසින් වැඩෙත්ම කාන්තාවකට අවශ්‍ය ආත්ම විශ්වාසය ඇය තුළ ගොඩ නැගෙන ආකාරය දකින්නට හැකිය. සමාජය තුළ බාධක, දුක් කම්කටොලු බිඳලමින් ඉදිරියට ගමන් කරන්නට රිසි ඕනෑම කාන්තාවකට ගැලපෙන ධනාත්මක නවකතාවක් ලෙස ජේන් අයර් කෘතිය හඳුන්වා දිය හැකිය.