ඇනා කැරනිනා යනු රුසියානු මහාගත්කරු ලියෝ ටෝල්ස්ටෝයි විසින් රචිත සම්මානිත අග්‍රගණ්‍ය කෘතියකි. නීරස විවාහ ජීවිතය අතහැර ප්‍රේමය සොයායන ඇනා ගේ ඛෙදාන්විත ජීවන ප්‍රවෘත්තිය මෙම කතාවේ දැක්වේ. සාර් රජවරුන් රුසියාව පාලනය කරන සමය කතාවට පසුබිම් කාලවකවානුව වේ.
‘වසරකට ආසන්න කාලයක් තිස්සේ රොන්ස්කිගේ අනෙක් සියලු ආශාවන් පරදා නැගුණු, එමෙන්ම ඇනාගේ හදවත නිරන්තරව බියෙන් කීරි ගැස් වූ යමක් විය. ඒ හේතුව නිසාම, අතිශය ආනන්දජනක වූ සොම්නසේ සිහිනය සැබෑ වීලාය. සුදුමැලිව, සැලෙන මුවින් යුතුව ඔහු ඈ ඉදිරියේ සිටියේ ඇයට සැනසෙන ලෙස ආයාචනා කරමිනි.
මෙය ලෝකයේ මෙතෙක් බිහි වූ විශිෂ්ටතම මනෝ විද්‍යාත්මකම නවකතාව වශයෙන් සම්භාවනාවට පාත්‍ර වූ Anna Karenina කෘතියේ සිංහල පරිවර්තනයයි.
මේ මහා කෘතිය රචනා කරන මහා ගත්කතුවර රුසියානු ජාතික ලියෝ ටෝල්ස්ටෝයි, තම අති ප්‍රබල පරිකල්පන ශක්තිය මෙහෙයවමින් ජගත් සාහිත්‍යයෙහි දකින්නට ලැබෙන අමරණීය චරිත කිහිපයක් නිර්මාණය කරයි.
ඔහු මෙම කෘතිය රචනා කිරීම ආරම්භ කළේ 1873 මාර්තු 18 වැනිදාය. දෑවුරුද්දක් පුරා ලියැවුණ මේ මහ නිර්මාණය පුරා තත්කාලීන රුසියානු සමාජය පිළිබඳ සුවිශාල දර්ශන පථයක් සමඟ ජීවිතය පිළිබඳ සදාතනික සත්‍යයන් රැසක්ද දැක්නට හැකිය.
සුපිරි පැළැන්තියට අයත් විවාහක කාන්තාවක් වන ඇනා, තම නීරස වූත්, බොල් වූත් ජීවිතය හැර දමා සැබෑ ප්‍රේමයක නිනව් සොයා යයි. එනමුදු ඇයට සිදු වන්නේ රුදුරු සමාජයේ ගොදුරක් වන්නටය.
විවාහකයන්-අවිවාහකයන්, තරුණයන්-තරුණියන්, බාලයන්-මහල්ලන්, නාගරිකයන්-ගැමියන්, ධන කුවේරයන්-දුගී දුප්පතුන්, උගතුන්-නූගතුන්, කුහකයන්-නිර්ව්‍යාජ මිනිසුන් සිය ගණනාවකට ජීවන හුස්ම පිඹිමින්, ටෝල්ස්ටෝයි අපට පවසා ඇත්තේ මේ විසල් ජගත් තලයේ ඇති අප්‍රමාණ වූ විවිධත්වයයි. නපුර කවදත් බියකරු බවයි. ප්‍රේමයේ සදාතනික සොඳුරු බවයි.
2008 හොඳම පරිවර්තන සාහිත්‍ය කෘතියට හිමි රාජ්‍ය සාහිත්‍ය සම්මානය දිනූ නවකතාව මෙය වේ.
